Spaugilegri hliðar skrifræðisins!

Blessuð kerlingin - þetta eru hrakfarir.

Ég lenti í spaugilegum rökræðum við tollverði og lögreglu Boston flugvallar í fyrra þegar ég dró unglingsson minn með til Ameríku. Hann hafði ekki verið í álfunni síðan að við bjuggum í Kanada 1998, og einhverra hluta vegna hafði hann samkvæmt upplýsingum tollayfirvalda týnst í Bandaríkjunum það ár.

Nú þarna stóð ég með soninn sem lifandi sönnun þess að hann hefði bara alls ekki týnst í Bandaríkjunum 1998.

Það sem augsýnilega hafði gerst var að hann hafði aldrei verið skráður út úr Bandarikjunum inn í Kanada einhvern fleiri tuga skipta sem við keyrðum yfir landamærin.

Tollverðirnir voru nú ekki alveg sáttir við þessi málalok, að drengurinn væri hinn hraustasti og hefði hug á að berja land guðs augum aftur. Þannig að við áttum að rekja okkur í gegnum allar landamærastöðvar sem við hefðum hugsanlega farið yfir það ár (8 árum áður) svo hægt væri að finna blóraböggul í kerfinu sem ekki hefði verið að standa sig.

Ég þurfti að beita mig verulegum aga og hunangsætri rödd, áður en þeir sáu að þetta var auðvitað galematias.

En þetta segir okkur auðvitað að hið ótrúlega skrifræði kanans, boðbera frjálsra óheftra viðskipta, alþjóðvæðingar og óhefts flæðis í ferðum fólks um heiminn !!! getur brugðist og í afleiðingum þess tekið á sig spaugilega mynd.

Fangelsuð í Bandaríkjunum

Athugasemdir

[Ragnhildur Sverrisdóttir, 12.12.2007 kl. 11:30]

Ég lenti einu sinni í þessu, hafði þá ekki verið skráð út úr landinu. Ég mátti dúsa um tíma inni á skrifstofu á vellinum á meðan hver borðalagði maðurinn á fætur öðrum skoðaði passann minn. Til allrar hamingju slapp ég inn í landið.

[Anna Karlsdóttir, 12.12.2007 kl. 23:26]

Þetta er auðvitað ákveðið Paradox Þrymur! Já Ragnhildur mín það verður ekki annað sagt um bandaríska tollverði, að þeir stíga stundum ekki vitið. En gott að þú komst inn fyrir landsteinana þrátt fyrir allt.