Hvaða lausnir boðar Sigurjón Þórðarson?

Fyrrum alþingismaður frjálslynda flokksins Sigurjón Þórðarson er fróður maður. Fróður um fiskveiðimál og hefur verið dugmikill í að láta skoðanir sínar í ljós um sjávarútvegsmál þjóðarinnar. Því miður týnist oft gagnrýnin í orðaflaumi, manninum liggur svo ógnar mikið á að koma fólki í skilning um annmarka ríkjandi fiskveiðistjórnunarkerfis. Nú lætur hann móðan mása um hvaða líklegu lausnir ríkisstjórnin mun tilkynna almenningi varðandi mótvægisaðgerðir vegna niðurskurðs þorskveiðiheimilda. Sigurjón er einkar óánægður með framlag Háskóla Íslands og þá sér í lagi framlag hagfræðistofnunar til mats og ráðgjafar á umræddum vanda. Ég ætla ekki að fara að mótmæla honum þar, því ég er honum sammála að því leyti að ég skil hreinlega ekki afhverju líffræðingar og hagfræðingar geta ekki leitt betur saman hesta sína en raun ber vitni, ef menn væru þverfræðilega þenkjandi í meira mæli en er raunin er möguleiki að hægt væri að fá heildstæðari mynd á hlutina en nú er.

Ég er einkar ósátt við málflutning Sigurjóns þegar kemur að óhemju mikilli vitneskju hans um hvernig stjórnin hyggist leysa úr málum þegar hann hneykslast yfir að stjórnin muni hygla konum í mótvægisaðgerðum sínum. Ég veit raunar ekki neitt um það sjálf en myndi fagna því ef þeim yrði í fyrsta skipti í sögu íslensks sjávarútvegs og þróun hans veittur sá heiður að tillit yrði til þeirra tekið sem jafninga og þáttakenda í atvinnugreininni. Hér er bein tilvitnun úr blogginu hans - meti hver sem meta vill hvað maðurinn á eiginlega við. 

"Það á að bæta konur um nokkra þorska.

Eflaust væri þetta allt gott og blessað ef það væri búið að ígrunda forsendur niðurskurðarins en svo er alls ekki enda hafa stjórnvöld enn ekki rætt við þá sem hafa lagt fram vel rökstudda gagnýni á veiðiráðgjöfina, hvað þá haft fyrir því að fara yfir hana. Jón Kristjánsson fiskifræðingur lagði t.d. fram gögn sem enginn hefur hrakið, gögn sem sýna að stór hrygningarstofn sé langt í frá að vera ávísun á nýliðun - samt er haldið áfram og boðaðar sérstakar mótvægisaðgerðir fyrir konur."

Ég vil leyfa mér að mótmæla harðvítuglega samlíkingu hans á konum og þorskum, raunar segir hann að bæta eigi konur um nokkra þorska og er það nokkuð áhugavert, því ekki er nokkur leið að skilja slíka ambögu. Á hann við að við missi þorsksins eigi að flytja konur nauðugar inn á staðina til að viðhalda lífi í deyjandi sjávarbyggðum, eða á að fara að veiða konur í stað þorsks?  Eins og flestir íslendingar vita er yfirleitt talað um karlmenn þegar talað er um þorskhausa. Ég veit ekki hvort að Sigurjón er miðaldra bitur karlmaður sem finnst konum ofaukið, en raunin er að þær eru jafn mikilvægar sjávarútveginum og karlar, ef ekki sem beinir þáttakendur á þeim vettvangi þá oft sem burðarliðir samfélagsins, sem uppalendur barnanna sem þar upp alast og geta (hugsanlega en þó ólíklega) tekið við og endurnýjað atvinnulíf samfélagsins þegar til lengri tíma er litið.

Sigurjón ber mikla virðingu fyrir Jóni Kristjánssyni og á sá síðarnefndi það fullkomlega skilið, en endurnýjun hrygningarstofnsins er ekki tengdur konum eða þáttöku þeirra sérstaklega í sjávarútvegi, heldur fremur vistfræðilegum þáttum t.d æti þorsksins en ekki síður veiðiaðferðum, sókn og ýmsum öðrum samverkandi ytri þáttum sem ég treysti mér hreinlega ekki til að fara út í, í smáatriðum, enda þekkir Sigurjón það vel. Mér finnst gagnrýni hans á ráðleggingar um niðurskurð og hvaða skilningur á stofna-dynamik liggur að baki góðra gjalda verð...og nú veit ég að þetta hljómar eins og illur frasi. En hvaða lausnir telur Sigurjón ákjósanlegar og á hvaða forsendum?

Og......Mér finnst  það fara mönnum betur að bera virðingu fyrir systrum sínum! 

Athugasemdir

[Sigurjón Þórðarson, 12.7.2007 kl. 17:41]

Ég vil byrja á að þakka Önnu fyrir að fjalla um skrif mín og vonast til þess að eftir að hún sé einhverju vísari um lausnir sem Frjálslyndi flokkurinn hefur lagt til og ég hef tekið undir og rökstutt á fundum víða um land og í greinarskrifum í blöðum og útvarpsviðtölum en Anna hefur greinilega farið á mis við.  ´

Áður en lengra er haldið þá er ég ekki upphafsmaður þess að blanda konum sérstaklega inn í svokallaðar mótvægisaðgerðir vegna gífurlegrar skerðingar á þorskveiðiheimildum. Það voru ráðherrar Samfylkingarinnar gerðu það og ég greip boltann á lofti og ég vona svo sannarlega að þau skrif hafi ekki verið meiðandi en sú var ekki ætlunin.

Það sem ég tel vera skynsamlegt að gera er að veiða 100 þús tonn meira af þorski en ráðgjöf Hafró gerir ráð fyrir og er það fyrst og fremst vegna þess að einstaklingsvöxtur þorsks Íslandsmiðum er við sögulegt lágmark og þess vegna vandséð að það sé gerlegt að fjölga þorskum þar sem þeir sem eru fyrir skortir greinilega æti.

Hér eru tillögur Frjálslynda flokksins sem flokkurinn lagði upp með fyrir kosningarnar 12 maí sl.

1. Hafrannsóknarstofnun verði færð undan stjórn hagsmunaaðila

2. Fiskiskiptaflotanum verði skipt upp í 4 útgerðarflokka og undirbúið að færa færa flotann í sóknarstýringu í áföngum þar sem byrjað verði á útgerðarflokk minnstu bátanna.

3. Fisktegundum í kvóta verði fækkað.

4. Fiskveiðar verði strax opnaðar fyrir nýliða með því að leyfa handfæraveiðar á eigin bátum allt að 30 tonn að stærð með tveimur mönnum mest í áhöfn og 4 rúllum. Að 5 árum liðnum ber að endurskoða regluna og taka upp sóknarstýringu til takmörkunar ef ástæða þykir til.

5. Sett verði löggjöf um sölu og leigu á aflaheimildum og tryggð þjóðareign á fiskimiðunum og nýtingu þeirra. Meginreglan verður sú að aflaheimildir beri að nýta til veiða. Leiga og sala aflaheimilda fari aðeins um einn farveg, sérstakan opinberan viðskiptamarkað. Við sölu á aflahlutdeild verður hún skilgreind sem afnotaréttur í takmarkaðan tíma gegn gjaldi til ríkisins.

6. Tekjum ríkissjóðs af viðskiptum með aflaheimildir um opinbera viðskiptamarkaðinn verði skipt að jöfnu milli ríkis og sveitarfélaga.

7. Veiðar og vinnsla verði aðskilin fjárhagslega og allur óunninn fiskur verði seldur á markaði.

8. Tekinn verði upp jafnstöðuafli 220 þús. tonn í þorski. Til aflahlutdeildarkerfisins verði ráðstafað sem svarar meðaltali síðustu 15 ára ( áætlað um 170 þús. tonn.)

9. Því sem er umfram hlut aflahlutdeildarkerfisins á hverju ári verði ráðstafað til leigu um viðskiptamarkaðinn og þar af verði tuttugu þúsund tonn af þorski úthlutað til veiða frá landssvæðum þar sem verulegur samdráttur hefur orðið í aflaheimildum og hagvöxtur síðustu ára hefur verið hvað minnstur og jafnvel neikvæður. Þær heimildir verði leigðar með þeim skilyrðum að gert verði út frá viðkomandi landssvæði og aflinn seldur á markaði þar og unninn. Leigutekjum ríkisins af þessum sérúthlutuðum veiðiheimildum verði ráðstafað til atvinnuuppbyggingar á sömu landssvæðum

----------------

Ef það er eitthvað sem þú vilt fá nánari rökstuðning fyrir þá skal ég reyna að rökstyðja það eftir bestu getu.

Í sjálfu sér er ég ekki mjög áfjáður í að hafa jafnstöðuafla en það  einfaldlega skynsamlegt út frá því að öllum líkindum mun reynslan fljótt leiða í ljós að þessi veiði mun ekki valda hruni eða einhverri óáran.  Þessi tilraun sem nú hefur staðið yfir þar sem íbúar sjávarbyggðanna hafa verið í stöðu tilraunadýra í tilraun reiknisfiskifræðinga sem hefur ekki gengið eftir enda er viðtekinni vistfræði ýtt til hliðar.

[Anna Karlsdóttir, 13.7.2007 kl. 11:10]

Takk fyrir komment. Sigurjón

Bendi á bók eftir Alan Christopher Finlayson sem heitir Fishing for Truth - A sociological analysis of northern cod stock assessments from 1977-1990